牙骹戰下集

我阿媽其實係一個奇人，作為我寫ｂｌｏｇ內容之主角，佢都算受歡迎，不斷有人問我牙骹戰有冇下集，當然有啦！我阿媽已經將佢抑鬱情緒化做能量追擊我．作為佢個女，唯有拋個身出黎，犧牲一下自己．

幕一
阿媽：我今日見到郭太，郭太個女係大學生，識左個未讀過大學既男仔，佢想反對，我地勸佢唔好，費時第日個女嫁唔出賴左佢．
（大家，請留意我阿媽背後的潛台詞）
Ｍｅ：放心喎，我就萛嫁唔出，都唔係你責任．
阿媽：但係Ｘ太個仔至少讀過大學．俾張咭片佢，佢咪可以ｅｍａｉｌ你囉！（按：阿媽唔知咩叫ｅｍａｉｌ，只係我阿姨話佢知而家Ｄ人用ｅｍａｉｌ溝通，但佢套用時，竟又用得合宜，勁！）
Ｍｅ：Ｓｏ．．．
阿媽：郭太都贊成我想法，唔應該放個機會．
Ｍｅ：恭喜你搵到支持者．
阿媽：早前Ｂ太個仔我都冇介紹俾你，事關你阿姨見過，話唔ａｒｍ你．
Ｍｅ：真係麻煩哂！

幕二
阿媽：上次係超市見到ｘ太，我個心好唔安樂．
Ｍｅ：做咩唔安樂？
阿媽：我對人冇交待，見都唔見，好似睇唔起人地個仔．
Ｍｅ：咁你咪亂咁話原來我拍緊拖囉！
阿媽：（直視我雙眼）咁你係咪拍緊拖丫？
Ｍｅ：（俾佢嚇親，速逃）

幕三
阿媽：我想有個孫仔玩下
Ｍｅ：阿妹咪生左囉
阿媽：叫你生呀！如果再有孫，應該男叫文俊，女叫樂詩．（可惜佢仲未記得自己而家個一粒孫個名，次次聽佢亂叫）
Ｍｅ：名都改埋,咁你生番個咪得囉，我唔介意嫁

幕四
阿媽：你以前Ｄ男朋友幾好丫，而家去哂邊呀？
Ｍｅ：你剩係記得我兩個男朋友，一個結左婚，一個無聯絡．
阿媽：佢都幾好嫁，做咩冇聯絡．
Ｍｅ：你個時冇講嘛！